Que valorar ao escoller unha app de localización familiar: a lista de sete cousas

Buscas «app para localizar á familia» e saen vinte, todas cun mapa e unha familia sorrindo. As funcións parécense; o que as separa está na letra pequena e na filosofía. Esta é a lista que usamos nós para comparar (e para facer a nosa), co que hai que mirar en cada punto e exemplos con nomes. Se prefires que cho pregunten, o test fai isto mesmo en dous minutos.

1. Funciona cos móbiles que tedes?

Parece obvio e é o primeiro descarte. Buscar de Apple só funciona entre contas Apple. Family Link só supervisa Android. As apps de círculo (Life360, Mi Estela, GeoZilla…) e Google Maps mesturan iPhone e Android na mesma familia. Se na casa hai de todo, isto decide por ti.

2. É simétrica ou ten un supervisor?

Nun control parental (Family Link, Qustodio, FamiSafe, Find My Kids) un adulto ve o menor e o menor non ve o adulto; está feito así, e para nenos pequenos é o correcto. Nunha app simétrica (Buscar, Maps, Mi Estela) cada quen ve o mesmo do outro e cada quen decide. Con adolescentes, parellas e maiores, a simetría é a diferenza entre que a app dure ou que a desinstalen. Mira tamén se hai niveis (preciso, por zona, invisible) e quen pode usalos.

3. Avisa soa ou tes que mirar?

O que tranquiliza non é o mapa: é o aviso. Mira cantos sitios con aviso de chegada e saída ten o plan gratis (Life360: 2; Mi Estela: 3; Maps: ata 5 por persoa), se existe un botón «cheguei» e se hai SOS ao círculo. E le como o din: os avisos dependen da cobertura e dos permisos do móbil, e unha app honesta avísao.

4. Que fai cos teus datos? Hai anuncios?

Unha app gratis con anuncios págase con datos. Le a política de privacidade buscando dúas palabras: «vender» e «licenciar». A de Life360 (26 de agosto de 2026) di que licencia xeolocalización precisa a socios para a súa publicidade. Glympse declara na súa ficha datos para publicidade de terceiros. Mi Estela non vende nin licencia datos de localización a ninguén e non ten anuncios; explicámolo enteiro en que facemos cos teus datos e que non. Tamén importa onde está a empresa: unha europea está suxeita ao RXPD (Qustodio, Mi Estela); outras, non.

5. Canto custa de verdade?

Mira tres cousas: que inclúe o gratis (Life360: 2 lugares e 2 días de historial, con anuncios; Mi Estela: mapa, 3 sitios, SOS, chat, chamadas e videochamadas, sen anuncios), se o pago é por persoa ou por familia (Mi Estela: un Premium por círculo, 9,99 €/mes ou 99,99 €/ano; Life360 Gold: 9,99 €/mes na UE) e as subscricións semanais con prezos altos (GeoZilla: desde 11,99 € á semana na App Store de España). E unha proba: se deixas de pagar, que perdes? En Mi Estela, os recordos non se borran nin se bloquean.

6. E os menores?

Cun neno pequeno: control parental, configurado por un adulto. Cun adolescente de 14 ou máis (a idade de consentimento dixital en España): conta propia e simetría, con regras de seguridade razoables (en Mi Estela os menores non poden facerse invisibles: comparten como mínimo a súa zona). Desconfía das apps que presumen de escoitar o micrófono do móbil do neno: Find My Kids ofréceo («Sonido Entorno»), e iso xa non é localización, é outra cousa.

7. Que pasa cando falla?

Todas fallan sen cobertura, en interiores e cando o fabricante durme a app. A diferenza está en como o contan e en que fan: se gardan a última posición coñecida, se os avisos e o SOS saen sós ao volver o sinal, se teñen guías para Samsung, Xiaomi ou Huawei. Pregúntate se cho din antes de instalar ou o descobres nun mal momento. Nós dicímolo en que pasa sen cobertura e nas guías por móbil.

O atallo

Familia só iPhone que quere o mapa: Buscar. Neno pequeno con Android: Family Link. Compartir un rato: WhatsApp. Familia con adolescentes, maiores, iPhone e Android, que quere avisos, SOS e un sitio único sen anuncios nin venda de datos: Mi Estela. Todo isto, con fontes e data, nas comparativas.

Fontes

• Life360: política de privacidade (26 de agosto de 2026)
• Life360: plans e prezos (UE)
• App Store España: ficha de GeoZilla
• App Store España: ficha de Find My Kids